Santino zirkuko umea da. Herrialde osoan zehar dabil karabanan bere familia eta animaliekin: gaur hemen, bihar han. Berarentzat, leku finkoa baino, bere etxea Angie eta Gitano gurasoak dira, bai eta Giordano anaia, izeba eta osaba kontaezinak, lehengusuak eta, batez ere, Ehe birraitona ere, hots, Alemaniako azken zirku-enpresari handietako bat. Santinoren hamaikagarren urtebetetzean, zirku-pistan zer izatea gustatuko litzaiokeen galdetzen dio Ehek bilobari: domatzailea, pailazoa, akrobata….. Santinok ez daki zer erantzun.

 

Zirkuskind filmak Alemaniako azken nomaden bizitzak erretratatzen ditu, baita zirkuan haztea nolakoa den ere. Zerbaiten kide izateari eta komunitatearen botereari buruzko road movie dokumentala.